с. Помоздино

Иона да Поликсиния

Чужліс Иона Васильевич 1916 вося сентябр 3 лунӧ Помӧсдін сиктын, крестьянин семьяын. 1924 восянь велӧдчӧ Помӧсдінса 1-ӧд ступеня школаын, а сэсся водзӧ — ШКМ-ын (крестьянскӧй том йӧзлӧн школаын). Сылӧн медводдза велӧдысьӧн вӧлі Тима Вень. Велӧдіс и школаын, и ШКМ-ын (коми кыв, роч литература да лесоводство). Пыртіс Ионаӧс литературнӧй кружокӧ (ӧтлаын лэдзлісны ас киӧн гижӧм «Подув вӧр» литературнӧй журнал).

30-ӧд воясын шӧр велӧдчан заведениеяс уджалісны сӧмын Сыктывкарын (педучилище, кооперативнӧй техникум, индустриальнöй техникум). Матынджыксӧ Ульянаын уджаліс видз-му овмӧс техникум. Эжва катыдсаяс ёнджыка сэтчӧ и зілисны пырны. ШКМ-са уна выпускник муніс тайӧ техникумас. А вот Иона муніс Сыктывкарӧ, педучилищеӧ. Сӧветуйтіс пырны сэтчӧ вокыс, коді уна во учителяліс школаын.

Тадз Иона Васильевич ачыс пырис педагогическӧй туйвизьӧ. Со мый сійӧ казьтывліс ловъя дырйиыс на: «Педучилище да нӧшта преподавательясӧс дасьтан курсъяс помалӧм бӧрын менӧ мӧдӧдісны Руч сиктӧ. Сэн уджалі завучӧн, и ӧттшӧтш велӧді биология да химия. Тайӧ сиктас ме уджалі 1938 воӧдз. А сэсся вуджӧдісны Помӧсдінӧ. Но недыр мысти корисны Кулӧмдінса роноӧ инспекторӧн. Тані вӧлі 1939 вося арӧдз. А сэсся – армия. 1939 восянь 1946 воӧдз служиті Дальньӧй Востокын.

Война бӧрын нин помалі заочнӧя учительскӧй институт. 1946 восянь 1950 воӧдз уджалі Помӧсдінса шӧр школаын, велӧді география да рисование. Вӧлі и завучӧн. Ӧти кадӧ уджышті Помӧсдінса ронолӧн педкабинетын, а сэсся бара пыри школаӧ. 1977 воӧдз, пенсия вылӧ петтӧдз, велӧді география. 40 во велӧдігад уна бур учителькӧд ачым паныдасьлі. Жаль, унаӧн кувсисны, пӧгибнитісны Великӧй Отечественнӧй война дырйи. Тшӧкыда казьтывла ассьым коллегаясӧс: Поповӧс, Трошевӧс, Козловӧс да Сахаровӧс. Ог вунӧд бур ёртъясӧс: Гуляевӧс, Кармановӧс, мукӧдӧс. Уна нывкаӧс да зонкаӧс ме аслам олӧмын велӧді, и ставнысӧ казьтывла бурысь. Радла, кор найӧ олӧмас петӧны тӧлка йӧзӧн. Унаӧн лоисны учительясӧн, инженеръясӧн, учёнӧйясӧн, врачьясӧн, видз-му овмӧсса бур специалистъясӧн да с.в. Ме чайта, мый тан эм и менам пай…».

Торъя сёрни Иона Васильевичлӧн армейскӧй служба йылысь. Буретш война заводитчытӧдз (1939 воӧ) сійӧс нуӧны армияӧ. Ӧтиторйӧн мойвиис — веськаліс Дальньӧй Востокӧ. Рытыввылӧ кӧ веськаліс, код тӧдас, мый эськӧ лоис. Но война эз коль бокӧ и Игнатовӧс. Сылы ковмис тышкасьны японечьяскӧд СССР-ӧн Германияӧс кисьтӧм бӧрын.

И.В. Игнатовлӧн казьтылӧмъясысь: «1939 воӧ менӧ нуисны Дальньӧй Востокӧ, Приморскӧй крайса Уссурийск карӧ. Фашистскӧй Германиякӧд война йылысь тӧдмалім, кор вӧлім Японскӧй море дорса Посьет полуостров вылын. Ӧдйӧджык бӧр вайисны Уссурийскӧ. Расформируйтісны миянлысь ба­тальон и вӧчисны связьлысь полк. Ме веськалі кабельно-шестовой торъя ротаӧ. Миянӧс тшӧктісны могмӧдны бур связьӧн Тихоокеанскӧй флотлысь да армиялысь штабъяс. Линияыс зэв кузь — Хабаровсксянь Владивостокӧдз. Сьӧкыд вӧлi. Кыдзи мунас тайфун, пӧрлӧдлас линия вылӧ пуяс, сідзи и связьтӧг колям. 1942-1943 воясын лёк обстановка лоис Маньчжурскӧй граница вылын. Сэн японечьяс дасьтысисны уськӧдчыны. А ми дасьтысим па­ныд. Но война эз заводитчы. Сэк кості помасис война Рытыввылын. Германия усис. 1945 вося тулысын да гожӧмын Дальньӧй Востокӧ заводитісны локтавны рытыввывсянь боеспособнӧй, тышъяс пыр мунӧм частьяс да техника. Быд 20 минут мысти границалань муніс выль эшелон. Миянлысь частьнымӧс шыбитісны жӧ граница дорӧ, и пӧшти тӧлысь (август 9 лунӧдз) могмӧдім связьӧн ӧти дивизиялысь штаб. Август 9 лунлы паныд заводитчис артподготовка. Наступайтны петісны танкӧвӧй частьяс. На бӧрся граница вуджим ми. Уна китайскӧй деревня пыр лои мунны. А Цзяньск карсянь миянлысь частьӧс шыбитісны Корейскӧй полуостров вылӧ, Пхеньянӧ. Сэн олім гортӧ мунтӧдз. Маньчжурияын война помасис 1945 вося сентябр 2 лунӧ. Япония капитулируйтіс…».

Став олӧмсӧ сэсся вӧвлӧм фронтöвик йитіс челядькӧд. Сӧмын Помӧс­дiн школаын сійӧ уджаліс 32 во. Оліс лӧня, «висис» краеведениеӧн. Олӧм чӧжыс туяліс Эжва йывлысь да Помӧсдінлысь история. Сыӧн кольӧм архивъяслы доныс абу.

Тавося сентябр 3 лунӧ Иона Васильевичлы эськӧ тырис 85 арӧс. Казьтыштамӧй сійӧс бурӧн. Эм мыйысь.

А. Шебырев

 © Усть-Куломская межпоселенческая библиотека